أشرف الصباغ يكتب : موجات الهجوم على إيمان البحر درويش

أشرف-الصباغ-يكتب-موجات-الهجوم-على-إيمان-البحر-درويش

واضح إن الموجة شغالة على إيمان البحر درويش... ماشي... 

- إيمان البحر درويش غنى للخلايجة؟! 

- طيب ما هو حليم غنى للخلايجة!! وفيروز غنت للخلايجة، وللسعودية تحديدا!!! ومين من الفنانين والفنانات ماغناش للخلايجة؟! طبعا ممكن نتكلم عن الكتاب والشعراء والمثقفين برضه ونخليها ضلمة!!! فكر الأول قبل ما تجاوب..

- إيمان البحر درويش ماعملش حاجة غير إنه غنى أغاني سيد درويش، وممكن يكون بوظها كمان!!! 

- طيب وإيه المشكلة؟! هو فيه إجماع عام على أم كلثوم أو فيروز أو حليم أو فريد أو اسمهان أو العفريت الأزرق؟! وعلى فكرة، إيمان البحر درويش له تاريخ فني، سواء كان عاجبك أو مش عاجبك، لأن فيه في مصر ١١٠ مليون نفر، فيهم ناس بيحبوا شغل إيمان البحر درويش... وإيمان البحر درويش كان واحد من اللي بيتعدوا على الأصابع في جيلهم وكان له شرايط واسطوانات بتتباع بالهبل!!

- إيمان البحر درويش عنده ميول إخوانية؟ عنده ميول سلفية؟ عنده ميول أمنية؟ عنده ميول ناحية الجيش؟ 

- دا نص المطربين والممثلين (رجالة وستات) مدروشين أصلا، والنص التاني دهولة على دروشة على جهل وحمورية. وإذا ماكنتش مصدق روح على اليوتيوب وشوف كلامهم ولقاءاتهم وصورهم وهم بيحجوا وبيعملوا عمرة وزار وبخور وطهور!! إيمان البحر درويش ماعندوش أي ميول إخوانية ولا حتى ميول زفت سلفية، دا مواطن زي أي مواطن مصري مدهول من جهة، وفنان دماغه زي لحمة الراس وزي دماغ أجيال من الفنانين اللي لعبوا مع الأمن ومع اللواءات ومع الخلايجة ومع بتوع الفلوس والبيزنس ومع اللي بيروحوا يصلوا الفجر حاضر ومع اللي بيربوا زبيبة ودقن... وبعدين هو مين من الفنانين اللي مالعبش مع الأمن والمخابرات، سواء بمزاجه أو غصبن عنه أو عين في الجنة وعين في النار عشان المجد والشهرة وساندوتشات السمين: حليم أو أم كلثوم أو عبد الرحمن الأبنودي وسعاد حسني أو أو أو أو ... ممكن نقول أسماء بالهبل!!

- إيمان البحر درويش تخلى عن "القيم" المصرية؟!!! 

- دي بالذات ممكن تخليني اعمل زي ما هو عمل على اليوتيوب بالظبط. وهاعملها اسكندراني من أبو قير عشان صوتها يجيب من إسكندرية لغاية أسوان... قيم مصرية إيه يا بتوع القيم!!! قيم الرئيس ولا قيم صفوت الشريف ولا قيم ساويرس ولا قيم الأزهر ولا قيم السلفيين ولا قيم الإخوان ولا قيم أنور السادات ولا قيم الأسرة ولا قيم المخبرين وأمناء الشرطة ولا قيم القضاة والمستشارين وعيالهم ولا قيم أحبابك الفنانين والمسؤولين اللي باعوا أصول مصر الفنية والثقافية وبيرفلوا في نعيم الدينارات والريالات والقصور ولا قيم الدولة نفسها اللي هي على علم بالتحرش وبالاغتصاب وبقتل المعارضين وباعتقالهم وبالفساد وبالفاسدين ولا قيم القتلة والحرامية اللي بيطلعوا براءة وبيلاقوا ملايين من الشعب صاحب القيم يطبل لهم ويعر*ص لهم ولا قيم بتوع التوك شو وأعضاء مجلس الشعب اللي كلنا عارفين هم بييجوا إزاي وبيعملوا إيه  ولا قيم المتحرشين ولا قيم المغتصبين ولا قيم الناس في المواصلات والطوابير ولا قيم اللي بيصوموا وبيسبوا الدين ولا قيم الحشاشين ولا قيم بتوع العيال ولا قيم اللي بيبرروا التحرش والاغتصاب ولا قيم عبده مجانص... قيم مين يا بتوع القيم؟ وإيه هي بقى إن شاء الله القيم المصرية دي؟! ما إحنا من هونولولو مش من مصر!!!

نقول تاني عن القيم المصرية المجيدة، ولا كفاية كده عشان ماتزورش يا بتاع القيم إنت وهو وهي وهم!!! ممكن اقول لك عن قيم المسؤولين والإعلاميين والساسة وأعضاء مجلس الشعب اللي بيحطوا مصاحف في عربياتهم ومكاتبهم وبيحطوا صورهم بملابس الإحرام وبيحطوا فلوس كتير في البنوك وبيحطوا عيالهم في مناصب!! ممكن اكلمك عن المنتجين بتوع السينما والتلفزيون والفيديو ورؤساء التحرير اللي مش بس بيلعبوا مع الأجهزة، بل وكمان بيتاجروا بالستات وبيستغلوا احتياج الست وبيبيعوا وبيشتروا فيها وبيقاولوها على جسمها!! ممكن اكلمك عن أطفال الشوارع ومين بيتاجر بيهم وبيطلعهم غلطانين وولاد ستين كلب!!! ممكن اكلمك عن الشيوخ والمؤسسات الدينية اللي كل يوم تغير كلامها وتفرض حاجة باسم الله وبعدين تغيرها باسم الله برضه، وساعات تغيرها باسم الريال والدينار والأمير والملك (وكله بعلم الدولة وبعلم الرئيس وبعلم الأجهزة)!!! ممكن نقول كتير عن الفن والفنانين والمنتجين ورؤساء التحرير ونواب البرلمان والوزراء والقضاة واللواءات والظباط والمخبرين والمثقفين... تحب نقول المثقفين بيعملوا إيه كمان هم والمخبرين والوزراء والرؤساء وعيالهم وقرايبهم؟! 

نقول تاني عن القيم المصرية التليدة، ولا كفاية كده عشان بواسير بتوع القيم ما تنزلش؟! القيم دي، يا تيس، حاجة تراكمية وإحدى صور الهوية، مش مجرد عبط مصري بقينا مشهورين بيه ومفضوحين بيه في وسط اللي يسوا واللي مايسواش!!!