أنس دنقل يكتب : ضرورة ان نكتب ياناس !!

أنس-دنقل-يكتب-ضرورة-ان-نكتب-ياناس

مواقع التواصل الاجتماعي حققت ديمقراطية النشر..في متناول يد الجميع.. بشرط وحيد اجادة اساسيات مادة الاملاء !!

كلنا الي زوال.. اخرتها لن نختلف كثيرا عما تحمله عربيات جمع القمامة من مخلفات ادمية..سواء كانت عربية المخلفات.. موكب رسمي.. محمول علي مدفع فوقه نياشين او عربية المخلفات وراها ناس غلابة حافيين شايلين مرحوم مثلنا..واحد زينا واغلب مننا !!

يمكن اخونا الغلبان اسعد حالا من الباشا اللي ناشرين نعيه في الاهرام..اعلانات مبوبة..قريب فلان..نسيب ابن الوسخة علان..ليه؟؟ الغلبان مات ماسبش حاجة يختلف عليها الورثة ويلعنوا ميتين اللي خلفوه..الفقير ساب لباسين وفانلة مقطعين.. وذكري جميلة: ذكري دخوله علي عياله وبنته الكبيرة اخر النهار بقمعين جلاب عسل نجع حمادي.. 

الباشا يرجعوا من المعزي بتاعه.. العيال وامهم يتخانقوا..الواد الكبير استغل الهيصة والعزا ..سرق تحويشة العمر اللي تحت البلاطة..اداها لمراته القرشانة وخلعت في الزحمة!!

مايبقاش غير السيرة الحلوة..حتي السيرة الحلوة بتبهت برحيل معاصريها لتموت في زوايا النسيان !!

امير الشعراء احمد باشا شوقي لولا كلماته..مجرد باشا شركسي خدوا عزاه في عمر مكرم ولا قدام قصره وراح !!

نجيب محفوظ.. لولا ماخطته يداه..باشكاتب وزارة اوقاف..يوم ماييجي الوزير يعزي فيه..مرات المرحوم تزغرد في الجنازة ..قرايبه ياخدوا صورة تذكارية.. فرحانين واقفين ورا معالي وزير الاقاف..

كذلك يوسف ادريس..طبيب نص لبه مخه طاقق..نجم..سجين وربما لص سابق..كل الكتاب الجيدين مثل هؤلاء بغير استثناء..

الكتابة عمر تاني ..الكتابة حياة !!

شرط الكتابة الجيدة الخالدة: الصدق ثم الصدق ثم الصدق وللمرة المائة مليون الصدق..الكتابة الخالدة : تاريخ البسطاء بايدي البسطاء واقرارهم..الكتابة الخالدة جلوس علي كرسي الاعتراف ليغفر الله ماتقدم من ذنبنا وماتأخر !!

اسلوب ولغة الكتابة الخالدة: اكتب كما تفكر..كما تتنفس..كتابة تتسلل لثنايا القلب بغير استئذان ..كما تحسها وليدة اللحظة بغير تقعر..تطلع لغة فصحي..عامية..هيروغليفي..الشرط الوحيد الوصول للناس..

اصحاب الكتابات الغامضة..ادعياء الغموض الميتافيزيقي..يخبوا كتاباتهم في كيس المخدة..تغور بعيد عننا.. يحدفوها في اقرب سلة مهملات..يجروا بعدها لاقرب دكتور امراض نفسية لانقاذ ذواتهم المريضة..

الادباء الجيدين اطفال ابرياء..بسطاء بغير تكلف اوادعاء ..البساطة شرط الكتابة الحلوة..

الكتابة السيئة سبب رئيسي للاصابة بداء التخلف والتبول اللاارادي  كمايلي :

١_ كتابات الادعياء.. الانبياء المعصومين.. من ورثوا المجد كابر عن كابر..اهل الكرم والنخوة.. جداتهم ليست مثل جداتنا..ينطبق عليهن قول الشاعر القديم:

قوم اذا مااستنبح الاضياف كلبهموا قالوا لامهم بولي علي النار

لكن ستنا بنت الكلب كانت اخبث من جدي

"بالت ولكنها بالت بمقدار"..يعني حتي شختها كانت بحساب..ست بعيد عنكم :نتنة نتانة فوق العقل !!

٢_ كتاب النصائح الدينية الحميدة علي طريقة اغسل يديك قبل الاكل وبعد الاكل..النصيحة الحقيقية ليست كلمات لكن سلوك ..احساس بالناس.،عمل..قدوة حسنة بالافعال ..

٣_ كتاب الحقيقة الواحدة المطلقة التي لاتقبل نقض اوابرام..الكتابة الجيدة دعوة للحوار والمناقشة !!

تخيل صديقي القارئ لو جدي وجدك اتيح لهم ماهو متاح لنا حاليا من كتابة ظروف زواجهم ..افراحهم..احزانهم..بيعهم..شرائهم..علاقاتهم  مع بعض..ح يبقي شئ جميل نرجع له ..يخليهم يفضلوا عايشين بيننا ..مع احفادنا..لكن ماتوا ..اخدوا سرهم معاهم..ربنا يرحمهم ويرحمنا..هو ربك وحده العالم: كانوا ناس طيبين ولا ولاد ستين .....ب !!