ماهينور المصري : الحرية لكل مظلوم سياسي أو جنائي

ماهينور-المصري-الحرية-لكل-مظلوم-سياسي-أو-جنائي

مساء الخير ,

الحقيقة أنا اتأخرت جدا في اني ابتدي اكتب و كنت لاقية صعوبة أصلا اني ادخل على أكاونتي ...جزء يعني من الحاجات الكتير اللي بتبقى ضايعة منك و بتبقى عايز ترجعها بعد الخروج من السجن ..و في كل الأحوال مش حتبقى أهم من عمر ناس بيضيع بلا مبرر و لا سبب . بس حتى لما قدرت افتحه من يومين ماكنتش قادرة اكتب شئ.. احساس بالذنب اني خرجت و في الاف غيري مظاليم لسة جوة السجن وقفني كذا مرة من الكتابة .. عارفة ان مافيش أي دعي لاحساس أي حد خرج بالذنب و لكن للاسف ده بيبقى احساس عند أغلبنا أنك سيبت حتة منك كبيرة جوة.

انا تم القبض عليا فجأة و بلا أسباب و خرجت فجأة و بلا أسباب برضوا.   

تجربة السجن المرة دي مختلفة و ده لسببين :

أولا: اني اتقبض عليا في بداية موجة قبض كبيرة جدا و الحقيقة المرة دي أكتر مرة اشوف فيها اعداد معتقلين سياسين و حتى جنائيين .

ثانيا: أنك تقضي فترة 6 شهور مابتشوفش أهلك و بتطمن عليهم بصعوبة في ظل جائحة و خوف مرعب كانت تجربة قاسية علىنا جوة و على أهالينا برة. (ربنا يكون في عون كل حد ممنوع عنه الزيارة) و حتى لما الزيارات رجعت كانت بعيدة عن بعض ووقتها غير كافي انك تطمن على أهلك.

ناس كتير باركتلي على خروجي بس الواحد فعلا مش قادر يحس بحرية و فرحة في ظل وجود عدد من الاصدقاء و عدد كبير من الجدعان و المظاليم جوة السجن .. بس أنا بشكر كل اللي ساعد في خروج أي شخص مادام ماكانش في أي مساومات على مبادئنا و أفكارنا .. و مستنيين منهم خروج أعداد أكبر و ان شاء الله يبقى قريب . و بشكر كل المحامين اللي بيشتغلوا في ظروف صعبة جدا و بيحاولوا يطمنوا كل مسجون مع ان مافيش حاجة في ايديهم.. و بشكر عائلتي و صحابي القريبين اللي استحملوا كتير أوي أوي و هونوا على الواحد فترة الحبسو بشكر كل اللي بعتلي و سأل عليا و افتكرني.

في أسامي كتير اعرفها و اسامي أكتر ماعرفهاش تستحق الخروج و الحياة يمكن أكتر مني كمان.. بس في كل الاحوال اللي بيحلم بعالم أحسن و أوضاع أفضل مكانه مش جوة السجن.

الحرية لكل مظلوم سياسي أو جنائي.

قلبي مع كل جدع و كل مظلوم مقفول عليه زنزانة .. قلبي مع أهلنا في فلسطين و لبنان و في كل مكان في العالم فيه نضال لحقوق البشر.. قلبي لسة قادر يصدق أن كل صعب له نهاية و كل ليل له آخر.

شكرا مرة تانية لكل حد فرح بخروج مسجون و الحقيقة منظومة السجن في حد ذاتها لازم يبقى في نقاش في جدواها في حد ذاته بس ده موضوع لوحده ينضم لمواضيع تانية كتير. 

الحرية و الحياة لكل انسان