الشاعر الراحل

أحمد فؤاد نجم : بيانات على تذكرة مسجون

profile
  • clock 12 فبراير 2022, 11:09:42 م
  • eye 663
  • تم نسخ عنوان المقال إلى الحافظة
Slide 01

الإسم:  صابر
التهمة:  مصرى
السن:  أجهل أهل عصرى
رغم انسدال الشيب ضفاير من شوشتى لما لتحت خصرى
المهنة:  وارث عن جدودى والزمان صنع الحضارة والنضارة والأمان
البشرة:  قمحى
القد: رمحى
الشعر: أخش
م الدريس
لون العيون:  إسود غطيس
الأنف:  نافر كالحصان
الفم:  ثابت فى المكان ولما جيت أزحزحه عن مطرحه كان اللى كان
جهة الميلاد:  فى أى أوضة مضلمة تحت السما على أرض مصر من أى بيت وسط النخيل مطرح مايجرى مادام مايكونش قصر
الحكم:  من سبع تلاف سنة وانا راقد سجين أطحن على ضراسى الحجر من الضجر وابات  حزين
ملحوظة:  سألنى سائل
حبستك طالت ... وليه ؟!
لأنى صابر وابن نكته وابن إيه
مافيش مخالفة ركبتها ضد القانون
لأنى ختيف والقانون  .. سيفه ف إيديه
تسأل علىّ المخبرين
وف أى حين
تسمع وتفهم قصتى  ..  ألِف وبِهْ
الإسم صابر ع البلا أيوب حمار
شِيٰل الحمول قسمتى والإنتظار
أغرق فى أنهار العرق طول النهار
والِم هم ى فى المسا وارقد عليه
عرفتوا ليه ؟!
مع حبى العظيم
إلى حبى العظيم: 
صافى ناز 


1974/11/6    نجم

القصيدة الأصلية بخط يد الشاعر الراحل أحمد فؤاد نجم

التعليقات (0)