رمضان كريم لباقر

يارب زيح القهر

عايشينه من يومه

فقرا وصومنا الشهر

ايه تاني هنصومه 

واقفين على الشباك

بشمعتين قايدين 

متشعبطين في رضاك

يفتحوا الزنازين

أقرا فصبر جميل

واختم بفتح مبين

الاولة باقر

وشه بلون النيل

في لحظة الفيضان

والتانية باقر

قلبه حليب بيسيل 

في هزة الاحضان

والتالتة باقر

مهما الزمان بيميل

ما يهزهوش سجان

قريت ياسين

ودعيت بقلبي

يا موحدين

تايه في دربي

انده صحابي

ما حد يسمع

ابعت جوابي

يروح ويرجع

يرجع يروح

فوق السطوح

ناح الحمام

كلي جروح

كلي ألام

ندهني نوح

اركب معاه

قولتله صاحبي

كان لسه جانبي

من غيره ابدا

عمري ما اروح

الفجر قرب

والليل مغرب

وقلب نعمة

عمال بيضرب

ينده يا باقر

يرد قلبه

عمال يعافر

حزنه وغلبه

شهرين تلاتة

سنتين تلاتة

وجعين تلاتة

البسمة صدقة

وان كان شحاتة 

ولعت شمعة 

شمعة وشمعة

اتنين تلاتة

ربك يا نعمة

رب الغلابة

كان عنده حكمة

لاتنين تلاتة

خمسة وستة

ناموا في حتة

سنين طويلة

ولما قاموا

صلوا وصاموا

ضحكوا ولعبوا

لان ربك

ما حد غلبه

قادر يرجع

من تاه في دربه

من قدك انت

ع الخلق أرحم

رمضان كريم

بس انت أكرم