دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

****

" يا جميل و إسمه جمال "

 اللى يشوف الحال

يفتح كتاب التاريخ

على صفحتك يا جمال

و يغنى موالك

الامة ترحالك

و الفقرا جوه القلب

و فى نن عينك و بالك

و الامريكان و الصهاينة

اعداء ليوم الدين

يا زعيم فى قلب التاريخ

كل النفوس الحلوة

عشقاك و دعيالك

اللى خانوك شياطين

و اللى باعوك ملاعين

و انت ف ليالى الضلمة

بدر ف سمانا بخيالك

و إمام دروب ملايين

 يا منصف الفلاحين

يا ناصر العمال

يا ضحكة خضرا

ف قلوب بنات و عيال

حاضنين كتاب المدرسة

و بيقروا تاريخ أبطال

يا دعوة العيان

حقه العلاج بلا مال

يا فرحة الشعب 

بالعزة و الاستقلال

و حصارك لراس المال

و الاقطاع و الاستغلال

يا ضى وسط الضلام

يا جميل و اسمه جمال

مسحراتى الوطن 

و الحلم و الموال

يا أه

يا عين

يا ليل

 نصرت كل الشعوب بوقفتك يا جمال

جسور بلا حسابات ف مقاومة الاحتلال

جيفارا قالها و شافيز و مانديلا

وكل ابطال الشعوب و الاستقلال

انك امام جامع و قائد الأبطال

يا جميل و اسمه جمال 

 مسحراتى و انادى

يا ولادى يا احفادى

رمضان كريم

شهر و عظيم

فيه العظات و المعجزات 

و الإنتصار

الفجر لازم يولد نهار

و الصبح مولود من نور و نار

مسحراتى و ف انتظار 

الأمة ترفع راية انتصار

رمضان كريم

يا نايم إصحى

وحد الرزاق 

   ***