قصيدة جديدة أمين حداد : سيبك

profile
أمين حداد شاعر مصري
  • clock 1 يوليو 2021, 11:51:42 م
  • eye 1008
  • تم نسخ عنوان المقال إلى الحافظة
Slide 01

ستمتع بحياتك

سيبك من لذات المأكل والمشرب

سيبك من مشيك بتشرق وتغرب

والمحمول بيعد الخطوات وبيرسمها لك في خريطة بتتحرك

والعرق اللي بيتسرسب على ضهرك

سيبك من قعدة في شمس الرملة وجلدك بالسمرة بيتشرب

سيبك من صمتك لما الشعر يقرب

وهروبك لما جنانك يبقى المهرب

والكهربا لما الأجساد تتكهرب

وهدوءك بعدها وكأنك برة الدنيا بتتفرج

سيبك من رقص وضحك وورد ومغنى

سيبك 

واستغنى

سيبك من نفسك اللي صنعتها وصنعها لك خوفك وارجع إلى نفسك بالحق

واتنفس زي بقية الخلق

شوف الدنيا بعقلك

استمتع بالشر اللي بيطلع للعالم من أعماق البني آدم 

في طوره الأول 

واعرف إن الشر طبيعة ومسلك

في أعماق البحر الأزرق

الإسود دايمًا يتحول للأحمر

والشمس بعيدة يادوبك ع السطح تنوّر

والتمر الأخضر في نخيل القرية ساكناه غربان بتزعق باستمرار

وبتتدرب 

على منع طيور الزقزاق من سكنى القرية

والشجرة اللي بتعلا ..

جدورها تمد وتقتل شجرة ضعيفة قصادها

كل الكائنات كائنات الأرض

واحنا دودها وجرادها

إحنا أحياءها وجمادها

الغربان والأسماك والأشجار مش حاجة غريبة

والبني آدم برضه

كله محصل بعضه

استمتع بالعالم 

استمتع بحياتك

وبموتك

سيب للدنيا حبيبك

وادخل على ملكوتك

استمتع 

سيبك


التعليقات (0)