(كل عام ومصر الحبيبة آمنة سالمة عزيزة بفضل دم شهدائها وتضحيات أبنائها المخلصين)

مسحـراتـي فـي ليــلة الملحمــه

يـا ليله من رمضان ملاهـا النـور

النخل شـب عشان يطول السمـا

الله أكبـــر فــي نهــــار العبــــور

والعاشقين ع الدبابات والقوارب

من كـل قلـب محـب لـو غاضـب

والبحر قالب

والرايات ع الجسور

والشــط بيقــــرب علــى ولاده

عـاد الأمـل.. لمـا الـولاد عــادوا

يا ليله من رمضان يا ليلة قـدر

بتفكرينــي بانتصاري فى بــدر

على الظـلام والظلــم والغــرور

واللهِ كـان النبــي ويانــا بيكبّـر

مطرح ما داس القدم

الرمل بيخضّر

يا ليله من رمضان فى نور المولى

القـهــوجيــه كسّـــروا الطــاولـــــه

والحدادين فى ايديهم الشواكيش

والنجارين سابوا القِـزاز والشيـش

والكل يهتف: كيـف يا ربي أعيـش

مصــر الحبيـبــة بـالحـيــاه أولـــى

بالطبله دقة        وبقلبي دقة

ياللي سامعني   ما تقولش لأ

يا رب مصر الحبيبه الطيبه الصابـره

إنتَ بحالهـا، وحال كل العـرب، أدرى

يا رب سدد خطانا على طريق الحق

واجعـل رمالنـا وليالي عمرنا خضـرا

اصحى يا نايم

رمضـان كريــم