تكبير الخط تصغير الخط

ولو صحيتوا في يوم
مالقيتوا غير البوم
والحزن كان غالب
وأما الطوفان بيزيد
والحلم يبقى بعيد
خلوا الأمل قارب
عم رشاد
مهنته
نقابي للعمال
لون الشقا ف بشرته
أسمر كشط قنال
والايد معافرة الحياة
بتسند الأحمال
والعين بتشبه قمر
ليه السواد داير
كأنه ليل شوال
بس عليه ضحكة
فيها شبع م الفرح
بتعدي سور الجرح
بآلاف من الأميال
الأولة للعم
كلمة باقولها لكل عامل ايده مشقشقة م الشقا
والتاني للعم
صوتك عشان الحق يدوي في الوطن كما المطرقة
والتالتة للعم
السجن للعمال مدرسة عمره ما كان محرقة
عشرة وعشرة
عشرين تمام
ويزيدوا عشرة
ينهوا الصيام
رمضان كريم
لناس كرام
مظاهرة طالعة
من وسط جامعة
تهتف بصوتها
تسقط يا صدقي
تسقط معاهدة
من أرضي واخدة
ابني ودمي
قوتي وعرقي
حطيت في شنطة
بيانين معارضة
بقيت سياسي
م النهاردة
بقيت يساري
كده باختياري
من غير ما اداري
بكلمة واحدة
عمال وطلبة
راحوا وعدوا
من غير خوانة
في مرة كوبري
وبإيد جبانة
فتحوه عليهم
ماتوا صحابهم
قدام عينيهم
باحفظ اسامي
واملا كلامي
بناس عظيمة
عملت بلادنا
بالدم قيمة
عامل يومية
عامل في مصنع
صاحب قضية
والأصل مجدع
روحه قوية
صعب انه يركع
ربك في خلقه
عمال بيبدع
يارب حكمك
لبيته يرجع
من قدك انت
ع الخلق أرحم
رمضان كريم
بس انت أكرم